Yaponiyalı meteoroloqlar Sakuracima vulkanı ilə əlaqədar ən yüksək təhlükə dərəcəsi təyin ediblər.
İyulun 25-nə keçən gecə Kaqoşima prefekturasında yerləşən Sakuracima vulkanının bir neçə dəfə təkrar püskürməsindən sonra yaponiyalı meteoroloqlar ən yüksək təhlükə dərəcəsi elan ediblər.
TELEJURNAL. az AZƏRTAC-a istinadən xəbər verir ki, Yaponiya Meteorologiya Agentliyi ərazidəki təhlükə dərəcəsini 3 baldan ən yüksək 5 bala qaldırıb.
Gecə saat 01:45, 04:45 və 06:31 dəqiqələrdə vulkan təkrar püskürüb. Onlardan sonuncunun daha güclü olduğu və nəticədə tüstü və kül dumanının 2200 metrədək qalxdığı bildirilir.
Xəbər verdiyimiz kimi, Sakuracima vulkanının ilk püskürməsi bazar günü yerli vaxtla axşam saatlarında baş verib. Nəticədə 2,5 kilometr radiusda vulkanik süxurlar və kül səpələnib. Təhlükə dərəcəsi ən yüksək səviyyəyə qaldırılsa da, mütəxəssislər təkrar güclü püskürmənin gözlənilmədiyini qeyd edirlər.
Vulkan püskürməsi ilə əlaqədar informasiyanı toplamaq və təhlil etmək üçün Yaponiya hökuməti yanında fövqəladə qərargah yaradılıb. Kaqoşima prefekturasının yerli hökumət orqanları isə vulkana yaxın ərazidə yerləşən iki rayonda təxliyə elan ediblər. Təbii fəlakət nəticəsində xəsarət alanların olmadığı bildirilir.
Xatırladaq ki, bu vulkanın ən güclü püskürməsi 1914-cü ildə baş verib. Həmin vaxt 58 nəfər həyatını itirib.