Yaponiyada parlamentin yuxarı palatasına seçkilər iyulun 10-na təyin edilib
Tokio 15 iyun, TELEJURNAL AZƏRTAC-a istinadən xəbər verir ki,
Yaponiyada parlamentin yuxarı palatasına (müşavirlər palatası) seçkilər iyulun 10-na təyin edilib.
bu barədə qərar iyunun 15-də – parlamentin cari sessiyasının keçirildiyi son gündə qəbul olunub. Seçkiöncəsi kampaniyaya isə iyunun 22-də, gələn çərşənbə günü başlanacağı elan edilib.
Qeyd edək ki, bu seçkilər zamanı parlamentin yuxarı palatasındakı 248 yerdən 125-i uğrunda mübarizə aparılacaq. Bu yerlərdən 74-ü seçki dairələrində, bir yer Kanaqava prefekturasında boş qalan yer üzrə, qalan 50 yer isə proporsional nümayəndəlik sistemi üzrə müəyyən olunacaq.
Xatırladaq ki, Yaponiyada parlamentin yuxarı palatasındakı yerlərin yarısını tutmaq üçün seçkilər burada təmsil olunan deputatların altı illik səlahiyyət müddəti başa çatdıqda keçirilir.
Namizədlərin seçkiöncəsi kampaniyada debatlar zamanı əsasən milli iqtisadiyyat, diplomatiya, təhlükəsizlik və sosial təminat mövzularına üstünlük verəcəyi gözlənilir.