Vüqar Qurbanov: Bakıda baş verən partlayışla bağlı TƏBİB-in tabeliyindəki tibb müəssisələrinə 37 müraciət olub
Bakıda gecə klubunda baş verən partlayışla bağlı Tibbi Ərazi Bölmələrini İdarəetmə Birliyinin (TƏBİB) tabeliyindəki tibb müəssisələrinə ümumilikdə 37 müraciət olub.
AZƏRTAC xəbər verir ki, bunu aprelin 3-də jurnalistlərə açıqlamasında TƏBİB-in sədri vəzifəsini icra edən Vüqar Qurbanov deyib.
O bildirib ki, hadisə baş verən əraziyə təcili və təxirəsalınmaz tibbi yardım briqadaları cəlb edilib. Xəsarət alanlardan 23 nəfəri stasionar müalicəyə qəbul olunub. Həkimlər xəsarət alan şəxslərin sağlamlıqlarının bərpası üçün ciddi səylə çalışırlar. Digər şəxslərin müalicəsi davam etdirilir. Stasionara qəbul edilən iki nəfərə yardım göstərildikdən sonra vəziyyətləri normal olduğu üçün onlar evə buraxılıb. Vəziyyəti kritik olan xəstələrin yaxınlarına, valideynlərinə mütəmadi olaraq məlumatlar verilir. TƏBİB-ə müraciət edərək hər bir xəstə haqqında tam dolğun məlumat almaq mümkündür.
“Yanıq mərkəzinə olan müraciətlər daha çoxdur. Xəsarət alan şəxslər arasında travmatoloji sınıqla bağlı müraciət edənlər də var və onlar müxtəlif xəstəxanalara yerləşdirilib. Onlara da aidiyyəti üzrə yardım göstərilib”, – deyə Vüqar Qurbanov qeyd edib.