Volodimir Zelenski və Cozef Baydenin müzakirə edəcəyi məsələlər açıqlanıb
Ukrayna Prezidenti Volodimir Zelenski və ABŞ lideri Cozef Baydenin sabah, iyulun 12-də keçirəcəkləri görüşdə hansı məsələlərin müzakirə olunacağı açıqlanıb.
Telejurnal-ın xəbərinə görə, Ukrayna Prezident Ofisinin müşaviri Mixaylo Podolyak deyib ki, liderlər Ukraynaya silah tədarükünün sürətləndirilməsi barədə danışacaqlar.
“Görürük ki, əks-hücum əməliyyatları üçün bizə texnika, o cümlədən aviasiya komponentləri və uzaqmənzilli raketlər lazımdır. Prezidentlərin müzakirə edəcəyi növbəti məsələ Rusiyanın itkiləri olacaq”, – müşavir vurğulayıb.
Onun sözlərinə görə, Rusiya bu savaşda mütləq uduzmalıdır.
M.Podolyak söyləyib ki, V.Zelenski digər liderlərlə də görüşəcək: “Lakin təhlükəsizlik tədbirləri səbəbindən detalları açıqlaya bilmərəm”.
Qeyd edək ki, V.Zelenski ilə C.Bayden sabah NATO-nun Vilnüsdə keçirilən sammiti çərçivəsində bir araya gələcəklər.
