Ukraynada vətəndaşlarımızın təxliyəsi və təminatı üçün diaspor təşkilatları aktiv fəaliyyət göstərir

Ukraynada müharibə dönəmində vətəndaşlarımızın təxliyəsi və təminatı üçün diaspor təşkilatları tərəfindən bütün ölkə üzrə aktiv işlər həyata keçirilir.
“TELEJURNAL” AZƏRTAC-a istinadən xəbər verir ki, bu barədə  Ukrayna Azərbaycanlıları Radasının (UAR) baş katibi Ceyhun Məmmədov məlumat verib.
O bildirib ki, bu günə qədər Kiyevdən iki kollektiv təxliyə həyata keçirilib. Qatarla 1100 nəfər Moldova sərhədinə, 55 nəfər isə avtobusla İstanbula təxliyə olunub. Radaya daxil olan diaspor təşkilatlarımız da Ukraynanın müxtəlif şəhərlərində təxliyə işlərini həyata keçiriblər. Ancaq öz xətti ilə təxliyə olunan soydaşlarımız da çoxdur.
“Təbii ki, təxliyə və digər məsələlərlə bağlı səfirliyimizlə, Xarkovdakı fəxri konsulluğumuzla da əlaqə saxlayırıq, yerlərdəki təşkilatların işləri, vəziyyətlə bağlı məlumatları ona çatdırıram. Bütün bu işlərdə Azərbaycan dövlətinin, o cümlədən Diasporla İş üzrə Dövlət Komitəsinin dəstəyini hər zaman hiss edirik”, – deyə UAR-nın baş katibi əlavə edib.
C.Məmmədov qeyd edib ki, bundan başqa bütün bölgələr üzrə diaspor təşkilatlarımız gündəlik 200-300 nəfərə pulsuz yemək, ərzaq məhsulları, geyimlər paylayır. Bu aksiya davamlı olaraq həyata keçirilir.