Ukrayna yeni strategiyasında Azərbaycanı strateji tərəfdaş kimi göstərib
“Ukraynanın yeni milli təhlükəsizlik strategiyasında Azərbaycan strateji tərəfdaş kimi göstərilib.”
Bunu Ukrayna prezidenti Vladimir Zelenski Azərbaycan Respublikasının Prezidenti İlham Əliyevə telefon zəngi zamanı bildirib. Telefon söhbəti Sentyabrın 22-də baş tutub.
Prezident İlham Əliyev, öz növbəsində, qeyd edib ki, Azərbaycan üçün də Ukrayna strateji tərəfdaşdır.
Dövlət başçıları suverenlik və ərazi bütövlüyü məsələlərində iki ölkənin qarşılıqlı olaraq bir-birini dəstəklədiyini qeyd ediblər.
Telefon söhbəti zamanı, eləcə də, enerji, nəqliyyat, investisiya, aviasiya sənayesi, kənd təsərrüfatı, turizm, humanitar və idman sahələrində əməkdaşlığın genişləndirilməsi üçün konkret addımların atılmasının zəruriliyi qeyd edilib. bundan əlavə olaraq, dövlət başçıları pandemiya ilə mübarizə sahəsində hər iki ölkədə həyata keçirilən işlərdən danışıblar.
Sonda Prezident İlham Əliyev Ermənistan tərəfindən Azərbaycana qarşı törədilən hərbi təxribatlar barədə Ukrayna Prezidentini məlumatlandırıb.