TÜRKPA-nın Baş katibi: “Türk dünyasının rifahı və gələcəyi üçün göstərdiyi səylər həqiqətən təqdirəlayiqdir”
“Türk dünyasının ortaq sevinci olan yaxın tarixdə qazanılan zəfərlər və nailiyyətlər göstərdi ki, beynəlxalq aləmdə qarşılaşdığımız çətinlikləri və təhlükələri ancaq bir araya gələrək birgə hərəkət etməklə aradan qaldıra bilərik”.
“TELEJURNAL” Report-a istinadən xəbər verir ki, bunu TÜRKPA-nın Baş katibi Məhmət Sürəyya Ər qurumun Milli Məclisdə keçirilən Sosial, mədəni və humanitar məsələlər komissiyasının IX toplantısında deyib.
Onun sözlərinə görə, TÜRKPA keçmişdə olduğu kimi, bu gün də dünyanın, xüsusilə də regionumuzun üzləşdiyi çətinliklərin öhdəsindən gəlmək üçün üzərinə düşən məsuliyyəti yerinə yetirmək üçün böyük əzmlə işini davam etdirir: “TÜRKPA-nın türk dünyasının rifahı və gələcəyi üçün göstərdiyi səylər həqiqətən təqdirəlayiqdir və bu, həm də gələcəkdə qeyd olunacaq birgə uğurlarımızın təminatıdır. TÜRKPA əsas fəaliyyət sahəsi kimi, türk dövlətləri arasında qanunvericilik sahəsində əməkdaşlığı dəstəkləməklə türk dünyasında qanun və normaların uyğunlaşdırılmasında mühüm rol oynayır”.