Türkiyəli iqtisadçı: “Zəngəzur yolu ən sərfəli yol olduğu üçün tezliklə açılmalıdır”
“Zəngəzur quru və dəmir yolu iqtisadi cəhətdən ən sərfəli yol olduğu üçün tezliklə açılmalıdır”.
Bu fikirləri “Telejurnal” ın Türkiyə bürosuna Yıldız Teknik Universitetinin müəllimi, iqtisadçı professor Cemal Zehir bildirib.
O, Türkiyə Prezidenti Rəcəb Tayyib Ərdoğanın dünən Azərbaycana dövlət səfəri çərçivəsində Zəngəzur dəhlizi ilə bağlı çıxışı zamanı “yol mədəniyyətdir, yol yoxdursa, heç nə yoxdur” fikirlərini xatırladıb:
“Əslində, Rəcəb Tayyib Ərdoğan bu çıxışı ilə Ermənistan rəhbərliyinə kəskin bir ismarış ünvanladı ki, bu layihəni ləngitməyin. Ermənistanın nə Azərbaycana, nə Türkiyəyə, nə də digər bölgə ölkələrinə faydası var. Cənab Ərdoğan həm də bütün dünyaya bir mesaj göndərdi – bu yol bir sülh yoludur. Çünki Zəngəzur dəhlizi Çindən İngiltərəyə qədər bir ərazini əhatə edəcək Böyük İpək Yolunun əsas hissələrindən biridir. Avropa ilə Asiyanı birləşdirəcək bu yolun ən qısa zamanda çəkilməsi bütün dünyaya iqtisadi baxımdan da töhfə verəcək”.
