Sumqayıtda parkların və yaşıllıq sahələrinin suvarılması üçün texniki suların hazırlanması müzakirə edilib
Almaniya Beynəlxalq Əməkdaşlıq Cəmiyyəti (GİZ) tərəfindən həyata keçirilən “İçməli və tullantı suları” layihəsi çərçivəsində Sumqayıt şəhərində parkların və yaşıllıq sahələrinin suvarılması üçün texniki suların hazırlanmasını nəzərdə tutan layihə üzrə İşçi Qrupun iclası keçirilib.
‘TELEJURNAL’ “Azərsu” ASC-dən AZƏRTAC-a bildirilən məlumata istinadən xəbər verir ki, iclasda “Azərsu”nun, Ekologiya və Təbii Sərvətlər Nazirliyinin, GİZ və Sumqayıt Şəhər İcra Hakimiyyətinin nümayəndələri iştirak edib. Eyni zamanda, tədbirə Almaniyanın Lufviqshafen şəhərinin kommunal təsərrüfat idarəsinin rəhbərliyi də onlayn qoşulub. İclasda İşçi Qrupun rəhbəri “Azərsu” Mərkəzi laboratoriyasının müdiri Elçin Əliyev, Texnoloji proseslərə nəzarət, suyun təhlükəsizliyi və ekologiya şöbəsinin rəisi Cəmil Babayev, Tullantı su şəbəkələrinin istismarı şöbəsinin rəisi Xalid Abasov iştirak edib.
Tədbirdə tullantı sularının yaşıllıqların suvarılmasında istifadəsi imkanları barədə müzakirələr aparılıb. Hövsan, Bibiheybət və Müşfiqabad qəsəbələrində tullantı sularının təmizlənib yaşıllıq sahələrinin suvarma üçün istifadə edildiyi ərazilərlə tanışlıqdan sonra təcrübə mübadiləsinin aparılması qərara alınıb.
https://azertag.az/xeber/Sumqayitda_parklarin_ve_yasilliq_sahelerinin_suvarilmasi_uchun_texniki_sularin_hazirlanmasi_muzakire_edilib-1962586