Stoltenberq: “Vilnüs sammitində Ukraynaya uzunmüddətli yardım paketi qəbul ediləcək”

“NATO Vilnüsdə keçiriləcək yay sammitində Ukraynaya uzunmüddətli yardım paketini qəbul edəcək. O, Ukraynanı Şimali Atlantika Müqaviləsi Təşkilatının standartlarına uyğunlaşdırmaq üçün nəzərdə tutulub”.

Telejurnal xəbər verir ki, bu barədə NATO-nun baş katibi Yens Stoltenberq “Welt” nəşrinə bildirib.

“Ukraynanın gələcəyi NATO-dadır, lakin indi Ukrayna üçün prioritet özünü suveren və müstəqil dövlət kimi təsdiqləməkdir – əks halda üzvlüklə bağlı müzakirələrin mənası yoxdur”, – o deyib.

Stoltenberq əlavə edib ki, müharibə başa çatdıqdan sonra Ukraynanın təhlükəsizliyi ilə bağlı razılaşmalar olmalıdır ki, Rusiya sonda yenidən silahlanıb hücuma keçə bilməsin.