Şolz Ukraynaya sursatların tezliklə çatdırılmasının vacib olduğunu qeyd edib
Almaniya kansleri Olaf Şolz Kiyevə sursatın tez bir zamanda çatdırılmasının vacibliyini vurğulayaraq, Almaniyanın avropalı tərəfdaşları ilə birlikdə Ukraynaya hərbi yardımı davam etdirəcəyini bildirib.
TELEJURNAL xəbər verir ki, Şolz cümə axşamı Bundestaqda hökumətin bəyanatını açıqlayarkən deyib.
“Avropalı tərəfdaşlarımızla birlikdə Ukraynanı mövcudluğunu qoruması, müstəqil dövlət kimi qalması, həmçinin özünü müdafiə etməsi üçün Kiyevi silah və texnika ilə təmin etməyə davam edəcəyik. Hazırda Ukraynanı lazımi sursatla operativ şəkildə təmin etmək xüsusilə vacibdir”, – deyə o qeyd edib.
“Avropa Şurasının iclasında Aİ tərəfdaşlarımızla birlikdə daha yaxşı və davamlı təchizatı təmin etmək üçün əlavə addımlar atacağımız barədə müzakirələr aparacağıq. Silah və sursatların kəmiyyəti ilə yanaşı onların zamanında döyüş bölgəsinə çatdırılması da xüsusi əhəmiyyət kəb edir. Biz bütün bunları diqqət mərkəzində saxlamağa çalışırıq”, – Almaniya hökumətinin başçısı bildirib.
Eyni zamanda o, Almaniya hökumətinin Ukraynaya ikitərəfli yardımının həcminin 14 milyard avrodan çox olduğunu xatırladıb. Bundan əlavə, onun sözlərinə görə, Aİ Kiyevə təkcə bu il ümumi məbləği 18 milyard avro olan birbaşa büdcə yardımı şəklində geniş dəstək verib.
Qeyd edək ki, Avropa Şurasının iclası martın 23-24-də Brüsseldə keçiriləcək