Rusiya Dövlət Dumasının sədri: “Fransa vətəndaş müharibəsi astanasındadır”
Rusiya Dövlət Dumasının spikeri Vyaçeslav Volodin Prezident Emmanuel Makronu Fransadakı qeyri-sabitliyin səbəbkarı adlandırıb.
Telejurnal xəbər verir ki, o, teleqram kanalında dövlət başçısının hərəkətlərinin Fransanın məhvinə gətirib çıxardığını və ölkənin vətəndaş müharibəsi astanasında olduğunu yazıb.
Volodin paylaşımında Fransada təxminən bir həftədir davam edən küçə etirazlarına diqqət çəkib: “Fransada belə qeyri-sabitliyin səbəbi nədir? Cavab hazırkı Prezident Makronun siyasətindədir. Dövlət başçısı siyasi monopoliyaya can ataraq son illərdə ənənəvi şəkildə dövlətin həyatında mühüm rol oynayan həmkarlar ittifaqlarının rolunu azaldıb. Partiya sistemini ardıcıl olaraq zəiflədib. Bütün bunlar da problemlərin parlament divarları arasında deyil, küçədə müzakirə olunmasına gətirib çıxarıb”.
Spikerin fikrincə, Fransada vəziyyət zaman keçdikcə daha da pisləşəcək: “Çünki ölkənin siyasi sistemi çağırışlara qarşı dayanıqsız olub. Makron öz hərəkətləri ilə bir zamanlar güclü və sabit olan dövlətin özünü məhvetmə proseslərinə başlamasına gətirib çıxarıb”.
Volodin həmçinin bildirib ki, Emmanuel Makron daxili siyasətdə səhvlərə yol verərək beynəlxalq vəziyyətlə Fransa vətəndaşlarının diqqətini yayındırmağa çalışır: “O, Fransanı Ukraynadakı müharibəyə sürükləyib. Makrona olan inam azalır. Reytinqlər ən aşağı səviyyəyə düşüb. Əgər prezident seçkiləri indi keçirilsəydi, sağların nümayəndəsi Marin Le Pen seçkilərdə qalib gələrdi”.