“Real” Vinisiusa görə İspaniya Baş Purokurorluğuna müraciət etdi

“Real” futbolçusu Vinisius Juniorun ünvanına təhqirlər səsləndirdiyi üçün İspaniya Baş Prokurorluğuna müraciət edib.

Bu barədə klubun saytı məlumat yayıb. La Liqanın 35-ci turunun “Valensiya” ilə matçında rəqibin azarkeşlərinin Vinisiusu “meymun” və “axmaq” adlandıraraq təhqir etməsi futbolçuların əlbəyaxa davasına səbəb olub. Nəticədə oyun 8 dəqiqə dayandırılıb. Stadionun ictimai ünvan sistemi üzərində irqçi söyüşlərlə bağlı elan verilib. Arenadakı tablosda belə yazılıb: “Valensiya” futbolda zorakılıq və təhqirlərə qarşıdır”.

“Real” Futbol Klubu məsələyə öz kəskin etirazını bildirib: “Dünən oyunçumuz Vinisius Juniora qarşı baş verən hadisələri pisləyirik. Bu faktlar sosial və demokratik hüquqi dövlətimizin birgəyaşayış modelinə birbaşa hücumdur.

“Real” hesab edir ki, bu cür hücumlar həm də irqçilik cinayətidir. Ona görə də faktların araşdırılması və günahkarların müəyyən edilməsi üçün Baş Prokurorluğa müraciət etdik.

İspaniya Konstitusiyasının 124-cü maddəsi Prokurorluğun funksiyaları kimi qanunun aliliyinin, vətəndaşların hüquqlarının və ictimai maraqların müdafiəsi üçün ədalət mühakiməsinin həyata keçirilməsinin təşviqini müəyyən edir.

Bu səbəbdən və baş verən hadisələrin ciddiliyini nəzərə alaraq, “Real” xüsusi ittihamçı kimi Baş Prokurorluğa müraciət edib”.