Qırğızıstan portalı Azərbaycan Prezidentinin AZƏRTAC-a müsahibəsini rus dilində dərc edib
Qırğızıstanın “turktoday.info” portalı Azərbaycan Prezidenti İlham Əliyevin Gəncəyə səfəri çərçivəsində AZƏRTAC-a müsahibəsini rus dilində dərc edib.
“TELEJURNAL” AZƏRTAC-a istinadən xəbər verir ki, Azərbaycan Prezidenti İlham Əliyev müsahibədə Gəncə şəhərində görülən işlər, yeni tikilən obyektlərin istifadəyə verilməsi, Vətən müharibəsi günlərində erməni faşist ordusu tərəfindən dağıdılmış ərazidə Memorial Kompleksin təməlinin qoyulması, bu günlərdə Rusiyada erməni faşist Qaregin Njde haqqında filmin yayımının dayandırılması, aradan qaldırılması və digər məsələlərə aydınlıq gətirib.
Azərbaycan Prezidenti İlham Əliyev Memorial Kompleksin təməlinin qoyulmasından danışaraq deyib: “Bilirsiniz, bu dağılmış evlərin önündə olmaq, bax, bu dəhşətli mənzərəni seyr etmək hər bir azərbaycanlı üçün çox ağırdır. İkinci Qarabağ müharibəsi dövründə Gəncə dəfələrlə cinayətkar Ermənistan ordusu tərəfindən bombalanıb. Şəhərə 13 raket atılıb, onlardan 8-i partlayaraq əfsuslar olsun ki, insanların həyatına son qoyub, beş raket isə partlamayıb. Bu da öz növbəsində onu göstərir ki, Ermənistan ordusu nə vəziyyətdə idi. Ancaq bu namərd atəş nəticəsində həlak olan vətəndaşlarımız yaşamalı idi. Onların arasında uşaqlar, qadınlar, yaşlı insanlar da var idi, 6 uşaq həlak oldu. Təkcə Gəncə şəhərində 26 mülki vətəndaş namərd atəş nəticəsində həlak oldu, erməni faşizminin qurbanı oldu. Gəncə şəhəri həm “Toçka-U”, həm “SCUD” raketləri ilə atəşə tutulurdu”.
