Putin və Lukaşenko Kral III Çarlzın tacqoyma mərasiminə dəvət edilməyib – “Reuters”
Böyük Britaniya Rusiya, Belarus, İran, Myanma, Suriya, Əfqanıstan və Venesuela liderlərinə Kral III Çarlzın tacqoyma mərasiminə dəvət göndərməyib.
TELEJURNAL xəbər verir ki, bu barədə “Reuters” məlumat verib.
“Böyük Britaniyanın tam diplomatik əlaqələri olan digər ölkələrin dövlət başçıları, həmçinin Britaniya krallıqları və xarici ərazilərin nümayəndələri dəvət olunub”, – mənbəyə istinadla “Reuters” yazır.
Mərasimə dəvətlərin Şimali Koreya və Nikaraqua başçılarına deyil, yüksək rütbəli diplomatlara göndərildiyi də bildirilir.
III Çarlzın tacqoyma mərasimi mayın 6-da, şənbə günü Vestminster abbatlığında keçiriləcək. Onunla birlikdə həyat yoldaşı Kraliça Consort Camilla da tac taxır.
Jurnalistlərin fikrincə, mərasim təxminən 250 milyon funt-sterlinqə başa gələcək. Mərasimə 2000 nəfər dəvət olunub, yüksək rütbəli qonaqlar üçün xüsusi hava hərəkəti cədvəli tərtib edilib.
Şahzadə Harrinin həyat yoldaşı Meqan Marklın III Çarlzın tacqoyma mərasiminə gəlməyəcəyi bildirilib. Susseks hersoqu özü tədbirdən dərhal sonra Amerika Birləşmiş Ştatlarına qayıdacaq. Jurnalistlər bunun oğlu Arçinin doğum gününü mayın 6-da qeyd etməsi ilə əlaqədar olduğunu düşünürlər.