Premyer Liqa: Avrokuboka 4-cü vəsiqə və elitanı tərk edəcək klub sonuncu turda bəlli olacaq
Futbol üzrə Azərbaycan Premyer Liqasında XXXV tura yekun vurulub.
“Telejurnal” ın məlumatına görə, ikinci oyun günündə daha dörd qarşılaşma oynanılıb.
“Turan Tovuz” doğma meydanda “Səbail”lə heç-heçə edib – 2:2. Meydan sahiblərinin qollarını 2-ci dəqiqədə Şəhriyar Əliyev, 49-cu dəqiqədə isə Ayxan Quseynov vurub. “Dənizçilər”in heyətində 73-cü dəqiqədə Franko Mazurek, 90+3-cü dəqiqədə Qoba Zakpa fərqlənib.
Çempionluğunu rəsmiləşdirən “Qarabağ” evdə “Sumqayıt”a 1:2 hesabı ilə yenilib. “Gənclik şəhəri” təmsilçisində 33-cü dəqiqədə penaltidən Vüsal İsgəndərli, 39-cu dəqiqədə Səbuhi Abdullazadə adını tabloya yazdırıb. “Köhlən atlar”da 89-cu dəqiqədə Riçard Almeyda fərqlənib.
“Şamaxı” – “Qəbələ” və “Sabah” – “Zirə” görüşləri qolsuz bərabərliklə başa çatıb. Beləliklə, Premyer Liqada avrokuboka dördüncü vəsiqə və elitanı tərk edəcək klub sonuncu – XXXVI turda müəyyənləşəcək.
Turnir cədvəli:
“Qarabağ” – 87 xal
“Sabah” – 81 xal
“Neftçi” – 65 xal
“Qəbələ” – 49 xal
“Zirə” – 47 xal
“Turan Tovuz” – 39 xal
“Kəpəz” – 30 xal
“Sumqayıt” – 28 xal
“Səbail” – 26 xal
“Şamaxı” – 25 xal
Qeyd edək ki, turun ilk matçında “Neftçi” “Kəpəz”i 3:1 hesabı ilə üstələyib.