Politoloq: Azərbaycanın beynəlxalq arenada yeri və rolu yüksəlir
Bu gün Azərbaycan bütün dünyada beynəlxalq hüququn fundamental norma və prinsiplərini müdafiə edən etibarlı tərəfdaş imici formalaşdırıb. Ukrayna böhranından sonra Azərbaycanın dünya üçün əhəmiyyəti bir qədər də artıb. Nəzərə alaq ki, hələ Ukrayna böhranından əvvəl NATO-nun Baş katibi Yens Stoltenberq Azərbaycan Respublikasının Prezidenti İlham Əliyevə zəng edib və söhbət zamanı Cənubi Qafqaz regionunda postmünaqişə vəziyyəti, dünya enerji bazarındakı mövcud duruma dair fikir mübadiləsi aparılıb.
“TELEJURNAL” AZƏRTAC-a istinadən xəbər verir ki, bu sözləri açıqlamasında politoloq İlyas Hüseynov deyib.
O bildirib ki, Azərbaycan regional və qlobal geosiyasi aktorlarla balanslaşdırılmış siyasət yürüdür. Şuşa və Moskva bəyannamələri sayəsində Türkiyə və Rusiya kimi nəhəng ölkələrlə müttəfiqlik münasibətlərinin qurulması ilə yanaşı, Avropa İttifaqının da ölkəmizə diqqəti artmaqdadır. Enerji təhlükəsizliyi sahəsində Avropa İttifaqı ilə strateji xarakter alan münasibətlər hazırda keyfiyyətcə yeni müstəviyə qalxıb. Nəzərə almaq lazımdır ki, Ukrayna böhranı başlayandan sonra Fransa Prezidenti Emmanuel Makron Prezident İlham Əliyevə zəng edib, sonra isə diplomatik münasibətlərin 30 illiyi ilə əlaqədar məktub göndərib.
“Azərbaycanın beynəlxalq arenada yeri və rolu getdikcə yüksəlir. Ümumiyyətlə, son dövrlərdə dünyanın aparıcı ölkələrinin rəhbərlərinin Prezident İlham Əliyevə məktubları, telefon zəngləri və görüşlər dövlətimizin başçısının dünyada böyük nüfuz sahibi olmasından xəbər verir. Rusiya və Ukrayna prezidentləri də dövlətimizin başçısı ilə telefonla danışıblar. Türkiyənin xarici işlər naziri Mövlud Çavuşoğlunun Bakıya səfəri ilə yanaşı, Azərbaycan və Türkiyə prezidentləri telefonla danışıblar. İtaliya Nazirlər Şurasının Sədri Mario Draqinin dövlətimizin başçısına zəngi və Prezident İlham Əliyevin Böyük Britaniya Baş nazirinin Azərbaycan üzrə ticarət elçisi Baronessa Emma Nikolsonu qəbul etməsi Azərbaycanın müasir beynəlxalq münasibətlər sistemində rolunun gücləndiyini nümayiş etdirir. Qısa zaman kəsiyində baş verən hərəkətlilik Azərbaycanın dünya və region üçün necə əhəmiyyətli bir dövlətə çevrildiyini göstərir”, – deyə İlyas Hüseynov qeyd edib.
