Peter Mixalko: “Avropalılar Zaqatalada yetişdirilən fındığın dadını bilir”
“Zaqatala rayonu istehsal etdiyi fındıq hesabına Azərbaycanla Avropa İttifaqı (Aİ) arasında iqtisadi əməkdaşlığa töhvə verməkdədir. Avropalılar burada yetişdirilən fındığın dadını bilir”.
“TELEJURNAL.AZ” xəbər verir ki, bunu Zaqatalada keçirilən fındıq festivalının və “Yurdumun ləzzəti ” stendinin rəsmi açılışında Aİ-nın Azərbaycandakı nümayəndəliyinin rəhbəri, səfir Peter Mixalko deyib.
“Azərbaycan fındıq ixracı üçün dünyada 3-cü ölkəyə çevrilib. Avropada Zaqataladan fındıq tədarük edildiyini bilirlər. Bu, çox vacib amildir, Azərbaycanla Aİ arasında iqtisadi əməkdaşlıqdan xəbər verir. Bu, həmçinin ölkədə yetişdirilən məhsulların Avropa bazarlarına çıxarılması baxımdan imkandır”, – deyə o qeyd edib.
Bundan başqa, səfirin sözlərinə görə, Aİ Azərbaycandan məhsul, o cümlədən meyvə-tərəvəz idxalı ilə bağlı yerli istehsalçıları dəstəkləyir: “Bunun üçün Azərbaycan olan bir sıra tərəfdaşlarla birgə layihələr həyata keçiririk. Həmin tərəfdaşlardan biri BMT-nin Ərzaq və Kənd Təsərrüfatı Təşkilatıdır (FAO). Layihələrdən birinin hesabına Zaqatalanı məşhur edən dədə-baba fındıq sortunu , həmçinin bu bölgədə yetişdirilən məhsulları qorunan məhsul irsi siyahısına daxil etmişik”.
