Pentaqonun gizli sənədləri sosial şəbəkələrdə yayılıb
Pentaqonun Ukrayna müharibəsi ilə bağlı məxfi sənədləri Twitter və Telegram-da dərc edilib.
TELEJURNAL xəbər verir ki, Pentaqonun Ukrayna müharibəsi ilə bağlı gündəlik hazırladığı gizli hərbi məlumatlar sosial mediaya sızıb. ABŞ Müdafiə Nazirliyi sosial mediada yayılan bəzi sənədlərin manipulyasiya edildiyini vurğulayıb. Nazirlik sənədin yayılması ilə bağlı araşdırmalara başlanıldığını açıqlayıb.
Sənədlərdə silahların tədarükü qrafikləri, qoşunların sayı və döyüş sursatı xərcləri haqqında məlumatlar yer alıb. Məxfi kimi qeyd olunan fevral sənədlərinin birində Ukraynanın hazırda saxladığı bəzi qərb silah sistemlərinin miqdarı və əlavə sistemlərin təxmini tədarükü göstərilir.
Sənədlər arasında “tam məxfi” kimi qeyd olunan və 1 mart 2023-cü il tarixli sənəd daha çox diqqət cəlb edib. Sənəddə Rusiya və Ukrayna batalyonlarının mövqeləri və kəmiyyəti, hər iki tərəfdən ümumi təxmini itkilər göstərilir. Lakin bu sənəddə Ukraynanın itkin rəqəmləri hakimiyyətin rəsmi açıqlamaları ilə üst-üstə düşmür. Sənəddə toqquşmalarda 61 min-71 min 500 ukraynalının öldürüldüyü bildirilsə də, Rusiyanın itkilərinin 16 min ilə 17 min 500 arasında olduğu göstərilir. Hakimiyyət bu rəqəmlərin manipulyasiya edildiyini və həqiqəti əks etdirmədiyini bildirir.
Xəbərdən sonra Ukrayna Prezident Aparatının müşaviri Mixaylo Podolyak bəyan edib ki, sızan məlumat Rusiya kəşfiyyatı tərəfindən hazırlanmış “virtual saxta sızmalar” oyunudur.
ABŞ Müdafiə Nazirliyinin mətbuat katibinin müavini Sabrina Sinq verdiyi açıqlamada Müdafiə Nazirliyinin sosial mediada yazılan xəbərlərdən məlumatlı olduğunu və nazirliyin məsələni nəzərdən keçirdiyini, araşdırmalara başlanıldığını bildirib.