Observer: Qərbin Ukrayna ordusunu hazırlamaqda yol verdiyi səhvlər əks-hücumun yavaş tempini izah edir
Qərbin Ukrayna Silahlı Qüvvələrinin hərbçilərinin hazırlanmasında yol verdiyi səhvlər Ukraynanın əks-hücumunun yavaş tempini və əhəmiyyətli nəticələrin olmamasını izah edir.
Telejurnal xəbər verir ki, bu barədə Birləşmiş Kral Müdafiə Araşdırmaları İnstitutunun quru müharibəsi üzrə baş elmi işçisi Cek Uotlinq Böyük Britaniyanın “Observer” nəşrində dərc olunmuş “Qərb diqqətini Ukrayna qoşunlarının təliminə yönəltməlidir, əks halda bunun əvəzini biz ödəməli olacağıq” bildirib.
Onun sözlərinə görə, iki aydır Ukrayna qoşunları güclü möhkəmləndirilmiş müdafiə xətlərini dəlməyə və “Surovikin xətti” adlanan müdafiəni yarmağa çalışır.
Ötən yayın sonunda ukraynalılara uğurlu hücum əməliyyatları üçün lazım olanlar Qərb paytaxtlarında artıq məlum idi – bunlar artilleriya, mühəndis texnikası, taktiki hava hücumundan müdafiə sistemləri, mobil müdafiə vasitələri (piyada maşınları və s.) və kadr hazırlığıdır. Ukraynalılar yetərli miqdarda silah, mərmi və zirehli transportyorlar alıblar, mühəndislik və taktiki hava hücumundan müdafiə vasitələri isə daha az həcmdə.
Aylarla davam edən gecikmə Rusiya qoşunlarına müdafiə xətti qurmağa vaxt verib ki, bu da ukraynalıların işini xeyli çətinləşdirib. Ukrayna qüvvələrinə müxtəlif hazırlıq vəziyyətlərində çeşidli Qərb sistemlərini mənimsəmək və öz qoşunlarını çox mürəkkəb tapşırıqlara hazırlamaq üçün təxminən iki ay vaxt verilib.
Uotlinqin fikrincə, əsas problem, görünür, Ukrayna Silahlı Qüvvələrinin təliminin Qərb modelləri üzrə aparılması, müəyyən struktur və ən əsası, ukraynalılarda olmayan vaxt tələb etməsidir.
Bu bürokratik əngəllər Ukraynanın tərəfdaşlarının ciddi probleminə işıq saçır. Müharibə başlayandan Qərb hərbçiləri Ukrayna Silahlı Qüvvələri ilə qarşılıqlı əlaqə üsullarını uyğunlaşdıra biliblər.
Amma paytaxtlarda bürokratlar və diplomatlar Avropanın təhlükəsizliyinin gələcəyinin Rusiya ilə Ukrayna arasındakı qarşıdurmanın nəticəsindən asılı olmasına baxmayaraq, hələ də sülh dövrü nümunələri üzrə işləyirlər.
