Niderlandın Oistervijk şəhərində Azərbaycanın Müstəqillik Günü qeyd olunub
28 May – Azərbaycanın Müstəqillik Günü Niderland Krallığının Oistervijk şəhərində də qeyd edilib, Niderlandın Milli Qəhrəmanı və Medo ləqəbi ilə tanınmış Məmməd Məmmədovun xatirəsi anılıb.
TELEJURNAL AZƏRTAC-a istinadən xəbər verir ki, tədbirdə Oistervijk şəhərinin meri Hans Yassen, Məmməd Məmmədovun qızı Nansi Dumen və onun ailə üzvləri, Avropa Azərbaycanlıları Konqresinin sədri Sahil Qasımov və bu ölkədə fəaliyyət göstərən assosiasiyaların rəhbərləri, eləcə də Oistervijk şəhər sakinləri iştirak ediblər.
Tədbir iştirakçıları Niderlandın Milli Qəhrəmanı Məmməd Məmmədovun adına olan “Mamedovpad” küçəsini və onun xatirəsinə ucaldılmış abidəni ziyarət ediblər. Milli Qəhrəmanın abidəsi önünə əklil qoyublar.
Azərbaycanın Müstəqillik Günü münasibətilə tədbirdə milli geyimdə olan “Bayraq Gildiyası” musiqiçiləri çıxış ediblər.
Həmçinin tədbir iştirakçıları Amersfort şəhərinin “Leusden” qardaşlıq məzarında dəfn olunan azərbaycanlı əsgərlərin qəbirlərini də ziyarət edib, üzərinə gül dəstələri qoyublar.