MN: “Azərbaycan Ordusunun bölmələri nəzarətə götürülən ərazilərdə mövqelərin dəqiqləşdirilməsi prosesini həyata keçirir”
“Avqustun 26-da Ali Baş Komandan İlham Əliyevin göstərişinə uyğun olaraq, Azərbaycan Ordusunun bölmələri Laçın şəhəri, Zabux və Sus yaşayış məntəqələrinə daxil olublar və bu ərazilər tam nəzarətimiz altına keçirilib”.
“TELEJURNAL.AZ” “Report”a istinadən xəbər verir ki, bu fikirləri Müdafiə Nazirliyinin Mətbuat Xidmətinin rəis müavini, polkovnik-leytenant Anar Eyvazov deyib.
Onun sözlərinə görə, hazırda Azərbaycan Ordusunun bölmələri nəzarətə götürülmüş ərazilərdə mövqelərin dəqiqləşdirilməsi, yeni dislokasiya məntəqələrində bölmələrin yerləşməsi prosesi həyata keçirilir:
“Azərbaycan Ordusunun mühəndis qoşunları tərəfindən mina axtarma işləri də davam etdirilir. Laçın rayonu ərazisində avqustun 15-dən bu günə qədər 1300-dən artıq piyada əleyhinə mina aşkar edilib. Bu minaların da 2021-ci ildə, Vətən müharibəsindən sonra Ermənistanda istehsal olunması müəyyən olunub. Bu da açıq şəkildə Ermənistan silahlı qüvvələrinin və erməni silahlı birləşmələrinin Azərbaycan Ordusunun hərbi qulluqçularına, eyni zamanda, Azərbaycan əhalisinə qarşı təcavüzünün bariz nümunəsidir”.
