Məişət zorakılığına məruz qalanlar əsasən, qadın və uşaqlardır
Gəncə Dövlət Universitetində (GDU) “Məişət zorakılığının qarşısının alınması, həmçinin onunla mübarizə” mövzusunda tədbir keçirilib.
Dini Qurumlarla İş üzrə Dövlət Komitəsinin Gəncə bölgəsindən AZƏRTAC-ın bölgə müxbirinə verilən məlumata görə, çıxışlarda bu cür maarifləndirmə tədbirlərinin əhəmiyyəti qeyd edilib. Məişət zorakılığının subyektləri, cəmiyyətdə və məişətdə qadın zorakılığı, zorakılığın formaları, erkən və məcburi nikah barədə ətraflı məlumat verilib.
Tədbirdə deputat Pərvin Kərimzadə, Dini Qurumlarla İş üzrə Dövlət Komitəsinin Gəncə bölgəsi üzrə şöbəsinin müdiri Həsən Məmmədov, GDU-nun prorektoru Gülsüm Fətəliyeva və tələbələr iştirak ediblər.
Bildirilib ki, məişət zorakılığına məruz qalanlar əsasən, qadın və uşaqlardır. Bu gün dünyanın ən mühüm problemlərindən biri olan məişət zorakılığının qarşısının alınması üçün güclü qanunvericilik və dövlət dəstəyi ilə yanaşı, cəmiyyət özü, xüsusilə vətəndaş cəmiyyəti zorakılıq hallarına adekvat reaksiya verməlidir.
