MAQATE-nin ZAES-i qorumaq üçün mümkün variantı var – Qrossi
Beynəlxalq Atom Enerjisi Agentliyinin Rusiyanın işğalı altında olan Zaporojye Atom Elektrik Stansiyasının təhlükəsiz istismarı üçün “müvafiq həlli yolu” var.
TELEJURNAL xəbər verir ki, bunu MAQATE-nin baş direktoru Rafael Qrossi Vaşinqtonda Strateji və Beynəlxalq Araşdırmalar Mərkəzində çıxışı zamanı deyib.
O, bu ideya üzərində aylardır işlədiyini və bunun beynəlxalq dəstəyə ehtiyacı olduğunu deyir: “Əlbəttə ki, bu, həm siyasi cəhətdən mümkün, həm də həyat qabiliyyətli olmalıdır. Və mən belə bir təəssürat içindəyəm ki, bizim masada real həll yolu var”, – Qrossi qeyd edib.
Agentliyin baş direktoru əlavə edib ki, onlar münaqişənin siyasi həllini axtarmırlar, nüvə təhlükəsizliyi problemini həll etmək istəyirlər.
Zaporojye atom elektrik stansiyası 2022-ci ilin martından Rusiya işğalçı qüvvələrinin nəzarətindədir. Rusiyanın “Rosatom” dövlət atom enerjisi korporasiyasının nümayəndələri də Zaporojye AES-in ərazisindədir. Onlar kadr çatışmazlığı səbəbindən lazımi təcrübəsi olmayan insanları işə götürməyə hazırdırlar ki, bu da Rusiya ordusunun hərbi texnikalarını AES-in ərazisində yerləşdirməsi qədər təhlükəsizliyi zəiflədən vacib amillərdəndir.
Ukrayna Silahlı Qüvvələrinin Baş Qərargahının məlumatına görə, Rusiya qoşunları Zaporojye AES-in təlim mərkəzindən təlim avadanlıqları çıxarır. Ukrayna Energetika Nazirliyi bildirir ki, hazırda stansiyanın Ukraynanın nəzarətinə qaytarılması üzrə diplomatik səylər uğurlu deyil.
