Malayziya XİN rəhbəri: “BMT-nin ciddi islahatlara ehtiyacı var”
“Dünyanın üzləşdiyi böyük problemlərlə mübarizə aparmaq üçün Birləşmiş Millətlər Təşkilatının (BMT) ciddi islahatlara ehtiyacı var”.
Telejurnal xəbər verir ki, bunu Malayziyanın xarici işlər naziri Zambri Əbdül Kadir Bakıda keçirilən Qoşulmama Hərəkatının (QH) Əlaqələndirmə Bürosunun Nazirlər Toplantısında çıxışı zamanı deyib.
Nazir bildirib ki, Malayziya müsəlmanların müqəddəs kitabı olan “Qurani-Kərim”in İsveçdə yandırılması kimi nifrət ifadəsinin və oxşar hərəkətlərin artmasından narahatdır.
“Mövcud dünya nizamı məyusluq doğurur… Koronavirus pandemiyasının fəsadlarından hələ tam ayılmamış ölkələr inflyasiya və ilk növbədə, ərzaq məhsullarının qiymətlərinin artması kimi ciddi iqtisadi problemlərlə üzləşirlər. Bu da, xüsusilə yoxsul ölkələrə mənfi təsir göstərir”, – Zambri Əbdül Kadir deyib.
Nazir QH-nin mühüm yekun sənədlərini hazırladığına görə ölkəsinin Azərbaycana minnətdar olduğunu bildirib: “Biz həmçinin bu dörd il ərzində Qoşulmama Hərəkatına heç də asan başa gəlməyən mükəmməl və uğurlu sədrliyə, həmçinin əməkdaşlığa görə Azərbaycana təşəkkür edirik”.