“Lukaşenkonu hər dəqiqə öldürə bilərlər”
Belarus Prezidenti Aleksandr Lukaşenkonun taleyinin Ukrayna müharibəsindən asılı olması heç kimə sirr deyil. Kiyevin qələbəsi “Batka”nın ağır məğlubiyyəti anlamına gələcək. Kreml sarsıdıcı zərbə alarsa, Lukaşenko hakimiyyəti də çökər. Belarusun dövlət başçısı bunu yaxşı anlayır. Lukaşenko son vaxtlar qeyri-demokratik ölkələrə çoxlu səfərlər həyata keçirir. O, sanki özünə gələcək sığınacaq yeri axtarışındadır.
TELEJURNAL xəbər verir ki, “New Geopolitics Research Network”un direktoru Mixail Samus Lukaşenkonun vəziyyətinin göründüyündən də pis olduğunu düşünür. Təşkilat rəhbəri “Batka”nın daha çox rusiyalı həmkarı Vladimir Putinin tapşırıqlarını yerinə yetirdiyini deyir. Amma bu yaxınlığın da dayaqları güclü deyil.
“Lukaşenko elə adamdır ki, hər dəqiqə öldürülə bilər. Özü də bunu başa düşür. O, artıq heç kimə lazım deyil. Heç Putinə də. Çinlilər haqda ümumiyyətlə susuram. Putin onu hər yerə getməyə, hamını razı salmağa, diz çökməyi vadar edir, lap Belarusu ortaya qoymasını da istəyir”.
Samus daha çox Çinə səfərləri nəzərdə tutur. Yəni Putin Lukaşenkonu məcbur edir ki, Pekinə gedib Belarusun müstəqilliyinə kölgə salacaq təkliflər irəli sürsün.
“Nə üçün Çin hansısa Belarusu və ya Rusiyanı götürüb indi Putinin törətdiyi hərbi cinayətlərə görə özünü məsuliyyətə cəlb etsin? Mən başa düşürəm ki, çinlilər öz kommunist ideologiyasındadırlar, amma məncə, onlar reallıq hissini o qədər itiriblər ki, hara getdiklərini anlaya bilməyəcəklər. Rusiyada hər şey hərbi fəlakətə doğru gedir. Lukaşenko əsl hərbi fəlakətdən qaça bilər, amma Belarus qaça bilməyəcək”.
Mixail Samus Ukrayna müharibəsi haqda Qərb mətbuatına çox müsahibə verir. O, Kiyevin sonda qələbə qazanacağına ümidini itirmir. Təşkilat rəhbəri hesab edir ki, Rusiya Qərbin böyük dəstəyinə görə Ukrayna silahlı qüvvələrinə üstün gələ bilməyəcək. Samus Baxmutda işlər pis gedəndə də nikbinliyini qoruyur.