Konqo ordusu Ruandanın hücumunu dəf edib
Konqo Demokratik Respublikasının (KDR) ordusu Ruanda hərbçilərinin hücumunu dəf edib.
TELEJURNAL xəbər verir ki, bu barədə “Agence France-Presse” (AFP) Konqo Silahlı Qüvvələrinin komandanlığının bəyanatına istinadən məlumat yayıb.
Konqo ordusunun Şimali Kivu əyalətinin mərkəzi Qoma şəhərinin şimalında sərhədi keçən Ruanda bölmələrini dəf etdiyi bildirilir. Bəyanatda deyilir ki, Ruanda qoşunu “ölkəsinə qayıdıb” və indi Konqo hərbçiləri “təqib hüququndan istifadə etmək” niyyətindədirlər.
Agentliyin mənbələrinin verdiyi xəbərə görə, toqquşmalar zamanı Ruandanın 1 əsgəri həlak olub.
İki qonşu ölkə arasında münasibətlər 2021-ci ilin yanvarında, “23 Mart hərəkatı” üsyançı qruplaşmasının Konqonun şərqində aktiv döyüşlərə başladığı zaman kəskinləşib. Konqo hakimiyyəti Ruandanı üsyançıları dəstəkləməkdə ittiham edir.
