KOBİA-nın dəstək və xidmətləri ilə bağlı “INNOLAND”də təqdimat keçirilib

Kiçik və Orta Biznesin İnkişafı Agentliyinin (KOBİA) dəstək və xidmətlərinə dair Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin təşkilatçılığı ilə “INNOLAND” İnkubasiya və Akselerasiya Mərkəzinin rezident startapları üçün təqdimat təşkil olunub.

‘TELEJURNAL’ KOBİA-dan AZƏRTAC-a bildirilən məlumata istinadən xəbər verir ki, tədbirdə “İnnovasiyalar Mərkəzi”nin direktoru vəzifəsini icra edən Vüsal Rüstəmov, agentliyin İdarə Heyəti sədrinin müşaviri Zaur Qardaşov və digər şəxslər iştirak ediblər.

Təqdimat zamanı KOBİA-nın Biznesə xidmətlər departamentinin müdiri Natiq Heydərov və departamentin əməkdaşı Hümbət Abdullayev mikro və kiçik sahibkarlara verilən və onları 3 il müddətinə innovasiya fəaliyyətindən əldə etdikləri gəlirlər üzrə mənfəət və gəlir vergisindən azad edən “Startap” şəhadətnaməsi barədə ətraflı məlumat veriblər. Startaplar KOBİA tərəfindən təmin edilən daxili bazar araşdırması mexanizmi, təhsil, elm, tədqiqat və dəstək layihələrinin maliyyələşdirilməsi üçün qrant müsabiqəsi barədə də məlumatlandırılıb, iştirakçılar agentliyin dəstək və xidmətlərindən aktiv istifadəyə dəvət olunublar.

Tədbirdə, həmçinin iştirakçıların öz startaplarının inkişafı ilə bağlı fikirləri dinlənilib və onları maraqlandıran suallar cavablandırılıb.

https://azertag.az/xeber/KOBIA_nin_destek_ve_xidmetleri_ile_bagli_INNOLANDde_teqdimat_kechirilib-1956242