KİV: NATO Baş katibinin səlahiyyətlərinin uzadılması ilə bağlı qərar gələn həftə veriləcək

NATO-nun Baş katibi Yens Stoltenberq daha bir il alyansın rəhbəri vəzifəsində qalacaq, qərar gələn həftə rəsmiləşdiriləcək.

Telejurnalın məlumatına görə, bu barədə mənbələrə istinadən “Politico” qəzeti məlumat yayıb.

ABŞ rəsmisi nəşrə deyib ki, Stoltenberqin səlahiyyət müddətinin uzadılması artıq qərar verilmiş məsələdir. Qəzet yazıb ki, Qərbi Avropadan olan yüksək səviyyəli diplomat da bunu təsdiqləyib və əlavə edib ki, hər şey gələn həftə yekunlaşacaq.

Bundan əvvəl “The Times” qəzeti NATO-nun iyulun 11-də Vilnüsdə keçiriləcək sammiti ərəfəsində alyans ölkələrinin yeni baş katibin namizədliyi ilə bağlı razılığa gələ bilməyəcəyini, bununla əlaqədar Stoltenberqin səlahiyyət müddətinin yeni uzadılmasının gözlənildiyini yazıb.