Kim Çen In ağlayaraq xalqından üzr istədi
Şimali Koreya lideri Kim Çen In yaşadıqları çətinliklərə görə göz yaşları içərisində xalqdan üzr istəyib.
“telejurnal” “Qaynarinfo”ya istinadən xəbər verir ki, bu anlar həftə sonu Şimali Koreyada Hakim İşçi Partiyasının 75-ci ildönümü münasibətilə təşkil olunmuş hərbi paradda yaşanıb.
Şimali Koreya lideri Kim Çen koronavirus epidemiyasının şiddətləndiyi qarışıq vaxtlarda ölkəyə rəhbərlik edə bilmədiyi üçün üzr istəyib:
“Xalqımız atamdan sonra bütün məsuliyyəti mənə verdi. Amma səylərim və səmimiyyətim xalqımızı həyatlarındakı sıxıntılardan xilas etməyə bəs etmədi. Xalqımız mənə güvəndi, göy qədər yüksək, dəniz qədər dərin bir ümid bəslədi. Ancaq mən onların ümidlərini kifayət qədər doğrulda bilmədim. Buna görə çox təəssüf edirəm”.
Kim çıxışının böyük bir hissəsini də “böyük çətinliklər”, “saysız bəlalar” və “görünməmiş fəlakətlər” haqqında danışaraq Şimali Koreya xalqının qeyri-adi əzablarına həsr edib.
Qeyd edək ki, koronavirus epidemiyası üzündən ölkənin ən böyük ticarət tərəfdaşı olan Çin ilə ticarəti xeyli azalıb. Pxenyan yanvar ayında Çin sərhədini bağlayıb.
Ölkədə rəsmi olaraq hətta bir koronavirus hadisəsinin də qeydə alınmadığı bildirilir. Mütəxəssislər isə bu iddianı etibarlı saymırlar.