“Kapital Bank”ın adi səhmdarlarının sayı 3 % artıb
Bu il iyulun 1-nə “Kapital Bank” ASC-nin 199 adi və 77 imtiyazlı səhmdarı olub.
TELEJURNAL bu barədə Bankın yarım illik idarəetmə hesabatına istinadən xəbər verir.
Sənədə əsasən, son 1 ildə “Kapital Bank”ın adi səhmdarlarının sayı 6 vahid və yaxud 3,1 % artıb, imtiyazlı səhmdarlarının sayı isə dəyişməyib.
Adi səhmdarların sayında artım səhm sahibi olan fiziki şəxslərin sayının 5 nəfər və yaxud 2,6 % artaraq 197-ə, hüquqi şəxslərin sayının isə 2 dəfə artaraq 2-yə çatması ilə bağlıdır. İmtiyazlı səhmlər isə ötən il iyulun 1-nə olduğu kimi 71 fiziki və 6 hüquqi şəxsə məxsusdur.
Xatırladaq ki, “Kapital Bank” 2004-cü ildə, Birləşmiş Universal Səhmdar Bankının (“BUSbank”) bazasında yaradılıb. Onun nizamnamə kapitalı 265,85 milyon manatdır. Bankın səhmlərinin 81,08%-i daxil olduğu “PAŞA Holdinq” MMC-yə, 7,52%-i “PAŞA Sığorta” ASC-yə, 3,76 %-i “PAŞA Həyat Sığorta” ASC-yə, 2,82%-i “Bless” MMC-yə, 2,82% -i “Reveri” MMC-yə, 1,98%-i fiziki şəxslərə, 0,02% – “ABB-İnvest İnvestisiya Şirkəti” QSC-yə məxsusdur.
