“KAAN” döyüş təyyarələrinin layihələndirilməsində və istehsalında Azərbaycanın iştirak etməsi gücümüzə güc qatan addımdır-Oqtay Qasımov
Xəbər verdiyimiz kimi, Azərbaycan Müdafiə Sənayesi Nazirliyi və “Turkish Aerospase” (TUSAŞ) şirkəti arasında “KAAN” layihəsinə dair əməkdaşlıq protokolu imzalanıb.
Politoloq Oqtay Qasımov “KAAN” layihəsinin həyata keçirilməsini “Telejurnal”a şərh edib.
Uzun müddətdir ki, Türkiyə yerli təyyarəsini hazırlamaqla məşğuldur, artıq bu təyyarənin hazırlanıb sınağa verilməsi mərhələsidir. Bu döyüş təyyarələri beşinci nəsil olmaqla Türkiyənin özünün hərbi hava qüvvələrinin əlavə olaraq güclənməsi deməkdir. Türkiyə hərbi hava qüvvələri, əsasən, Amerikan istehsalı olan F-16 -dan təşkil olunub. Hal-hazırda Türkiyə özünün NATO müttəfiqi olan Amerika tərəfindən onun hərbi hava qüvvələrinin arsenalının yenilənməsi və təkmilləşdirilməsi məsələsi ilə bağlı çıxardığı bir çox problemləri nəzərə alaraq, özünün yerli müdafiə sənayesi vasitəsilə ordunun ehtiyaclarını qarşılamaq xətti tutub. Bu gün Türkiyə müdafiə-sənayi sahəsi Türkiyə ordusunun ehtiyaclarının 80 faizini qarşılamaqdadır. Bu kifayət qədər ciddi rəqəmdir, xüsusilə də, pilotsuz uçuş aparatları, hava hücumundan müdafiə sistemləri, raket sistemlərinin yenilənməsi və hərbi dəniz qüvvələrinə lazım olan hərbi gəmilərin layihələndirilməsi və istehsalı, o cümlədən, pilotsuz gəmilərin hazırlanması kimi layihələr həyata keçirilir.
Bunların içərisində ən önəmlisi yerli savaş təyyarəsi “KAAN”-dır. “KAAN” Türkiyəli mühəndislərin və yerli istehsal əsasında həyata keçirilən layihədir. Bu təyyarənin yüksək səviyyəli texnoloji vasitələri: görmə cihazları, naviqatorlar, radio elektron sistemləri Türkiyə mühəndislərinin kəşfidir.
Türkiyə hərbi hava qüvvələri təyyarələri balansına qəbul etdikdən sonra 2028-ci ildə bu təyyarələrin kütləvi və serialı istehsalına başlanılacaq. Bu prosesin həyata keçirilməsi dünyada Türkiyənin nüfuzunu daha da artıracaq və bu layihənin həyata keçməsi ilə hərbi hava qüvvələrinə lazım olan döyüş təyyarələrinin istehsalında dünya üzrə ən güclü dövlətlər sırasında olacaq.
Azərbaycan və Türkiyə arasında imzalanmış müqaviləyə əsasən, Azərbaycan mühəndisləri də Azərbaycanda “KAAN” təyyarələrini layihələndirmə prosesində iştirak edəcəklər.
Bu iki cəhətdən çox vacibdir: Azərbaycan mühəndisləri, artıq dünya səviyyəli layihələrdə iştiraka imza atırlar ki, bu Azərbaycanın elmi-texniki, həmçinin müdafiə sənayesinin inkişafına önəmli təsir edəcək amildir, digər tərəfdən isə bu layihənin həyata keçirilməsində Azərbaycanın da iştirakı gələcəkdə Azərbaycan hərbi hava qüvvələrinin beşinci nəsil təyyarələr ilə təmin olunması və ehtiyacların qarşılanmasında vacib rol oynaya bilər.
Bu çox mühüm məsələdir. Biz coğrafi mövqeydən olduqca həssas bölgədə yaşayırıq, ətrafımızda dövlətimizə qarşı düşmən mövqedə olan ölkələr var və bu da Azərbaycanı hər zaman ayıq-sayıq olmağa, özünü müdafiə qabiliyyətini daim gücləndirməyə vadar edir. “KAAN” döyüş təyyarələrinin layihələndirilməsində və istehsalında Azərbaycanın iştirak etməsi gücümüzə güc qatan addımdır.
Redaktor : Mehin Vəliyeva
Müxbir : Asiman Hafizqızı
