Putin Ərdoğanı belaltı vuranda olacaqları hesablamışdımı?

Hamının Türkiyə ilə Rusiya arasında münasibətlərin normallaşdığını düşündüyü bir vaxtda, Putin Ərdoğanı beldən aşağı vurdu. Ölkənin bütün TV və sosial media kanalları vasitəsilə Ərdoğanın görüş üçün Putini 2 dəqiqə gözləməsi videosu tirajlandı. Bu hərəkət Türkiyə ictimaiyyətini o qədər hiddətləndirdi ki, hətta Türkiyə XİN Çavuşoğlu təzyiqi azaltmaq üçün xüsusi açıqlama ilə çıxış edərək, burada Ərdoğanın təhqir edilməsi niyyətinin olmadığını bildirdi. İddia etdi ki, Putinin bu videodan xəbəri yoxdur və o da bunu özünə qarşı hörmətsizlik kimi qəbul edir. Bu fikirə istinad kimi isə Peskovun göstərilməsi isə sadəcə gülüş doğurdu. Çünki bunu sübut edəcək, nə audio, nə də video material tapılmadı. Rus tərəfinin rəsmi açıqlaması da olmadı. Və əlbəttə ki, Rusiyanın informasiya silahları olan “Russia Today” və “Sputnik”in bu videoları Putinin istəyinin əksinə çıxaraq bol-bol tirajlaması mümkün deyildi. Üstəlik, videonun qurma olduğu ortaya çıxdı. Belə ki, əslində gözləmə müddəti 2 dəqiqə deyil, 40 saniyə çəkmişdi və montajla uzadılmışdı. Ərdoğan görüşə gələrkən qəsdən zalın girişində 40 saniyəlik basabas yaradılmışdı və indi bu basabasın məhz bu montajı ərsəyə gətirmək üçün yaradıldığı aydın olurdu.

Ardınca türklər öz pilotsuz aparatlarının “Pantsir” HMS-i necə ovladıqlarının videolarını yaymağa başladılar və bununla bütün dünyaya Rusiyanın “ən müasir” HMS-inin real döyüş şəraitində mənasız oyuncaqlar olduğunu ortaya qoydular. Ərdoğan faktiki olaraq Rusiyanın “Pantsir” və aydın məsələdir ki, daha köhnə HMS sistemlərinin dünya silah bazarında satışına olan bütün ümidləri öldürdü. Artıq heç bir ciddi dövlət bu sistemlərə milyonlarla, milyardlarla vəsait xərcləməyəcəkdi. Ərdoğan öz intiqamını, onsuzda çətin maliyyə vəziyyətində olan Rusiyanı həm maliyyə cəhətdən sıxmaqla, həm də Tesla yarada bilməsə də, İsgəndər yaratmaqla fəxr edən Putinin silah sənayesinin nüfuzunu aşağı salmaqla aldı.