İsveçin Baş naziri: “Litvadakı zirvə toplantısından əvvəl NATO-ya üzv olacağımıza təminat yoxdur”
“NATO-nun Litvada keçiriləcək zirvə toplantısından əvvəl alyansa üzv olacağımıza təminat yoxdur”.
Telejurnal xəbər verir ki, bunu İsveçin Baş naziri Ulf Kristersson ABŞ Prezidenti Cozef Baydenlə görüşdən sonra jurnalistlərə açıqlamasında bildirib.
Baş nazir NATO-ya üzv olmaq üçün əllərindən gələni etdiklərini vurğulayıb: “Ancaq Türkiyə qərarı yalnız özü verə bilər”.
Xatırladaq ki, rəsmi Ankara İsveç hökumətindən terrorçu qruplaşmaların üzvləri və təəssübkeşlərinə sığınacaq verməməsini, onların Türkiyə əleyhinə fəaliyyətinin qarşısını alması kimi şərtlər irəli sürüb. Bu şərtlərə əməl edilməyəcəyi halda Türkiyə bu ölkənin alyansa üzvlüyünü bloklayacaq. Macarıstan da bu məsələdə Türkiyəni dəstəkləyir.
Qeyd edək ki, iyulun 11-12-də Litvanın paytaxtı Vilnüsdə NATO-nun Zirvə toplantısı keçiriləcək.
