İsveçin Bağdaddakı səfirliyi hücuma məruz qaldı
Ötən gün yüzlərlə nümayişçi Bağdaddakı İsveç səfirliyinin binasına soxulub.
Telejurnal.az “Reuters”ə istinadən xəbər verir ki, onlar səfirliyi yandırıblar. Mənbə agentliyə bildirib ki, diplomatik missiyanın əməkdaşlarından heç kim xəsarət almayıb. Başqa təfərrüatlar açıqlanmayıb.
Agentlik bildirir ki, Bağdaddakı etiraz aksiyalarını İraqın “Mehdi Ordusu” şiə təşkilatının lideri Müqtəda əs-Sədr təşkil edib. Nümayişlərə səbəb İsveçdə Quranın yandırılması ilə bağlı qarşıda keçiriləcək aksiyadır.
Xatırladaq ki, yanvar ayında isveçli-danimarkalı ifrat sağçı siyasətçi Rasmus Paludan İsveçin NATO-ya üzv olmaq planlarını pisləmək üçün Quranı yandırıb. İyunun 28-də İsveçdəki iraqlı qaçqın Qurban bayramı zamanı Stokholmun ən böyük məscidinin qarşısında Quranın bir neçə səhifəsini yandırıb.
Bu il baş verən bu və digər oxşar hərəkətlər müsəlman dünyasında pislənib və İsveçin NATO-ya daxil olması prosesini ləngidib.
