İsrail-Azərbaycan münasibətləri iki dost ölkənin münasibətləridir-Hikmət Məmmədov
“İsrail-Azərbaycan münasibətləri iki dost ölkənin münasibətləridir. Azərbaycanın tarix və beynəlxalq münasibətlər sistemi qarşısında verdiyi imtahan zamanı, yəni İkinci Qarabağ savaşı adlandırdığımız Vətən müharibəsində İsrail Azərbaycana öz dostluq mövqeyini bir daha nümayiş etdirib”.
Bunu İsrailin müdafiə naziri Yoav Qallantın ölkəmizə səfəri barədə danışarkən Milli Məclisin deputatı Hikmət Məmmədov deyib.
Onun sözlərinə görə, səfər iki ölkənin və xalqlarının maraqlarının nə qədər üst-üstə düşməsindən xəbər verir:
“Biz bilirik ki, İsrail bu gün beynəlxalq münasibətlərin ən vacib faktorlarından biridir. Müxtəlif sahələrdə o cümlədən yeni innovativ texnologiyalar, hərbi sənaye sahəsində dünyada tanınmış ölkələrdən biridir. Azərbaycanın milli maraqları onu tələb edir ki, öz təhlükəsizliyi üçün bu ölkə ilə çox sıx münasibətlər saxlasın, əlaqələr yaratsın”.
Deputat bildirib ki, İsrail və Azərbaycanın ortaq maraqlarını ifadə edən çoxsaylı səbəblərdən biri də Azərbaycanda tarixən yəhudilərin yaşaması və vaxtilə Azərbaycandan köç edərək İsraildə yaşayan Azərbaycan vətəndaşı olmuş çoxsaylı yəhudilərin İsraildə yaşamasıdır. Bu da ölkələr arasında körpü yaradır:
“Düşünürəm ki, bu səfər də özlüyündə məhz hazırkı yeni reallıqlar və yeni çağırışlar kontekstində İsrail- Azərbaycan münasibətlərinin daha da dərinləşməsi və genişləndirilməsi mahiyyəti daşıyacaq. Ona görə də bu səfər yüksək qiymətləndirilir. Əminik ki, hər iki ölkənin maraqları kontekstində mühüm irəliləyişlərə gətirib çıxaracaqdır”.
