“İslama maraq qlobal gücləri narahat edir”-İlyas Hüseynov

“Son dövlər Qurani-Kərimin yandırılması geniş vüsət alıb. Təəssüf doğuran məqam ondan ibarətdir ki, İsveç və Danimarkada bəzən polis də bu cinayətlərə şərik olur, dövlət də müvafiq şərait yaradır. Bu, tamamilə yolverilməzdir”. Bu sözləri politoloq İlyas Hüseynov   Telejurnal-a  açıqlamasında deyib.

“Digər tərəfdən, artıq İslam Əməkdaşlıq Təşkilatı Qurani-Kərimə edilən hücumları müzakirə etmək üçün onlayn iclas keçirəcəkdir. Fikrimcə, müsəlman dövlətlərini vahid ideya ətrafında birləşdirmək və müqəddəs kitabımıza qarşı bu aramsız hücumların qarşısını almaq üçün yaxşı nəticələrə gətirib çıxaracaqdır. Azərbaycan da daxil olmaqla, bir sıra dövlətlər Qurani-Kərimə qarşı edilən hörmətsizlikləri şiddətlə qınayıb və pisləyiblər. Bu da təbii bir haldır, çünki İslamın ləkələnməsinə cəhd qəbulolunmazdır.

Dünyada İslama maraq yüksələn xətt üzrə inkişaf edir. Bu da qlobal gücləri, qlobal imperiyaları narahat edir. Məhz bu cür cılız və məkirli addımlarla öz məqsədlərinə çatmağa çalışırlar. Lakin buna nail ola bilməyəcəklər. Əsrlər boyu İslam dini bir sıra sınaqlardan, çətin vəziyyətlərdən çıxıb. Lakin bu gün görürük ki, İslam ətrafında milyonları toplaya bilib. Bizim saf, müqəddəs dinimizə, kitabımıza kimlərsə ləkə salmağa, təhqir etməyə çalışacaqsa bu, onların özlərinin təhqir edilməsi deməkdir. Fikrimcə, müqəddəs saydığımız mənəvi dəyərlərimizə qarşı da heç kimə bu cür barbar və vandalcasına hərəkət etməyə icazə verməməliyik. Məhz İslam Əməkdaşlıq Təşkilatı bu barədə çox qəti və kəskin etirazını bildirməlidir”, – politoloq qeyd edib.