İran və Səudiyyə Ərəbistanının XİN rəhbərləri telefonla danışıb

İran və Səudiyyə Ərəbistanının xarici işlər nazirləri Hüseyn Əmir Abdullahian və şahzadə Faysal bin Fərhan Əl Səud telefonla iki ölkə arasında münasibətlərin normallaşdırılmasını müzakirə ediblər.

TELEJURNAL  xəbər verir ki, bu barədə bazar ertəsi İslam Respublikasının Xarici İşlər Nazirliyi məlumat yayıb.

“İran XİN rəhbəri səudiyyəli həmkarı ilə telefon danışığı zamanı Tehran və Ər-Riyad arasında münasibətlərin normallaşdırılmasına dair razılaşmanı və iki yüksək rütbəli diplomatın gözlənilən görüşünü müzakirə edib”, – deyə nazirliyin “Twitter” səhifəsində dərc olunan mesajda bildirilir.

Səudiyyə Ərəbistanının mətbuat agentliyi cümə axşamı bildirib ki, nazirlər tezliklə görüşmək barədə razılığa gəliblər. Daha əvvəl Abdullahian deyib ki, o, şahzadə Faysalla neytral məkanda görüşməyi planlaşdırır. Onun sözlərinə görə, Tehran Ər-Riyada onların görüşünü təşkil edə biləcək üç ölkə təklif edib.

Qeyd edək ki, martın 10-da Səudiyyə Ərəbistanı və İran iki ay ərzində diplomatik münasibətləri bərpa etmək və səfirliklərini açmaq barədə razılığa gəliblər. İki ölkənin nümayəndələri Pekində bir neçə gün danışıqlar aparıblar və ondan sonra üçtərəfli bəyanat hazırlayıblar.

Ər-Riyadla Tehran arasında münasibətlər 2015-ci ilin martında Səudiyyə Ərəbistanının başçılıq etdiyi koalisiyanın Yəməndə Ənsarullaha (husilərə) qarşı hərbi əməliyyat keçirməsi ilə gərginləşib. 2016-cı ilin yanvarında Səudiyyə Ərəbistanının Tehrandakı səfirliyi və onun Məşhəddəki konsulluğu Ər-Riyadda tanınmış şiə din xadimi Şeyx Nimr ən-Nimrin edam edilməsindən qəzəblənən nümayişçilərin izdihamı tərəfindən hücuma məruz qaldıqdan sonra krallıq İranla diplomatik əlaqələri kəsib.