İndoneziya və ABŞ-ın birgə təlimlərində 12 ölkədən hərbçilər iştirak edəcək.

Avqustun 1-14-də Sumatra və Borneo adalarında (Kalimantan) keçiriləcək İndoneziya və ABŞ-ın birgə təlimlərində 12 ölkədən olan 4 mindən çox hərbçi iştirak edəcək.

TELEJURNAL. az AZƏRTAC-a  istinadla xəbər verir ki, 2009-cu ildən keçirilən “Super Garuda Shield” manevrlərində 2 min indoneziyalı və 1100 amerikalı hərbçinin iştirakı gözlənilir. Əvvəllər təlimlərə yalnız quru qoşunlarının nümayəndələri cəlb olunurdu, indi isə onlara Hərbi Hava Qüvvələri, Hərbi Dəniz Qüvvələri və xüsusi təyinatlılar da qoşulacaq.

Manevrlərdə İndoneziya və ABŞ-la yanaşı, Avstraliya, Böyük Britaniya, Cənubi Koreya, Yaponiya və bir sıra digər dövlətlərin də iştirakı gözlənilir. İndoneziya komandanlığının məlumatına görə, təlimlərin məqsədi təhlükəsizliyin təmin edilməsi, təbii fəlakətlərin nəticələrinin aradan qaldırılması və humanitar yardımın göstərilməsi üzrə məsələlərin işlənib hazırlanmasıdır.

Kyodo agentliyi Çinin regionda və xüsusən də Cənub Çin dənizində mövqelərinin güclənməsi fonunda “Super Garuda Shield” təlimlərinin vacibliyini qeyd edir.