ICGB Yunanıstan-Bolqarıstan interkonnektorunun genişləndirilməsi imkanlarını araşdıracaq
Yunanıstan-Bolqarıstan İnterkonnektorun (IGB) ötürücülük qabiliyyətini artırmaq üçün bu qaz nəqli sisteminin operatoru olan ICGB şirkəti bazar tələbinin qiymətləndirilməsi prosesinə başlayır.
Telejurnal operator şirkətə istinadən xəbər verir ki, proses iki əsas mərhələdə həyata keçiriləcək.
Proses Bolqarıstanın “Bulgartransgaz” və Yunanıstanın DESFA qaz nəqli sistemlərinin operatorları, həmçinin Trans-Adriatik Qaz Boru Kəməri (TAP) ilə sıx əməkdaşlıq şəraitində həyata keçiriləcək. Məqsəd, Yunanıstan-Bolqarıstan interkonnektorunun mövcud texniki imkanlarının və onun ötürücülük həcminin artırılmasının zəruriliyinin nə dərəcədə əsaslı olub-olmadığını müəyyən etməkdir.
Xatırladaq ki, Yunanıstan-Bolqarıstan İnterkonnektoru (IGB) Xəzər dənizinin Azərbaycan sektorundakı “Şahdəniz” qaz-kondensat yatağının istismarının II mərhələsi çərçivəsində hasil edilən “mavi yanacağın” Bolqarıstana nəqlini nəzərdə tutur. “Bulgargaz EAD” dövlət şirkəti “Şahdəniz-2” yatağından 1 milyard kubmetr qazın tədarükü üçün “Şahdəniz” konsorsiumu ilə müqavilə imzalayıb. Azərbaycanın təbii qazı Bolqarıstanın tələbatının 25-30 %-ni ödəyə biləcək.
Ümumi uzunluğu 182 kilometr olan boru kəmərinin 150 kilometrlik hissəsi Bolqarıstan ərazisindən keçir. Boru kəmərin illik ötürücülük qabiliyyətinin 3-5 milyard kubmetr olacağı gözlənilir.
