Hindistanın Rusiyadan məhsul idxalı fevral-may aylarında 3,5 dəfə artıb.
2022-ci ilin fevral-may aylarında Hindistanın Rusiyadan məhsul idxalının həcmi ötən ilin analoji dövrü ilə müqayisədə 3,5 dəfə artaraq 8,6 milyard dollara çatıb.
TELEJURNAL. az AZƏRTAC-a istinadən xəbər verir ki, bu barədə “The Economic Times” qəzeti Hindistanın Ticarət Nazirliyinə istinadla məlumat yayıb.
Rusiyadan idxalın həcmindəki artım, əsasən neft tədarükü ilə əlaqədardır. Belə ki, Rusiyanın Ukraynaya qarşı hərbi təcavüzündən sonra bu ölkədən Hindistana neft ixracı 6 dəfə artıb.
Hindistanın Rusiyadan ümumi məhsul idxalı aprel-may aylarında pik həddə çataraq 5 milyard dollar təşkil edib. Hindistan RF-dən neftlə yanaşı, kömür, gübrə və bitki yağı tədarükünü də artırıb.
İdxalın artması fonunda Hindistan aprel-may aylarında öz məhsullarının Rusiyaya ixracını əhəmiyyətli dərəcədə azaldıb. İyun ayında dünya bazarında neft, kömür və qızıl ticarətinin artması səbəbindən Hindistanın ticarət balansındakı kəsiri ötən ilin eyni dövrü ilə (900 milyon dollar) müqayisədə beş dəfədən də çox artaraq 4,8 milyard dollara çatıb.
“The Economic Times” qəzetinin məlumatına görə, Qərbin Moskvaya qarşı sanksiyaları Hindistana Rusiya ixracatçıları ilə sərfəli müqavilələr imzalamağa kömək edib ki, bu da ölkənin iqtisadi maraqlarına uyğundur.
Qeyd edək ki, ötən il Hindistanın Rusiyadan məhsul idxalının ümumi həcmi 12 milyard dollar təşkil etmişdi.