“HaberGlobal” Heydər Əliyev Fondunun zəlzələ bölgəsinə yardımları ilə bağlı süjet hazırlayıb
Türkiyənin “HaberGlobal” televiziyası Heydər Əliyev Fondunun prezidenti Mehriban Əliyevanın göstərişinə əsasən, Fondun zəlzələ bölgəsinə humanitar yardım göndərməsi ilə bağlı “Azərbaycandan Türkiyəyə yardım əli” adlı süjet hazırlayıb.
TELEJURNAL-ın xəbərinə görə, süjetdə bildirilib ki, fevralın 6-da Türkiyədə baş verən və çoxsaylı insan tələfatına səbəb olan zəlzələ qurbanlarına dəstək məqsədilə Azərbaycanın birinci xanımı, Heydər Əliyev Fondunun prezidenti Mehriban Əliyevanın göstərişinə əsasən, Heydər Əliyev Fondunun göndərdiyi humanitar yardım artıq Qaziantepə çatıb.
Süjetdə Türkiyəyə ilk humanitar yardımın məhz qardaş ölkə olan Azərbaycan dövlətinin etdiyi xüsusi qeyd olunub. Bildirilib ki, Azərbaycan dövləti və xalqı yardım etmək üçün səfərbər olub.
