Gürcüstan hökuməti biomüxtəlifliyi qorumaq və inkişaf etdirmək üçün yeni qanun layihəsi hazırlayıb.
Gürcüstan hökuməti ölkənin Raça-Leçxum-Kvemo Svaneti bölgəsində yeni qorunan ərazilərin yaradılmasını nəzərdə tutan “Raçanın mühafizə olunan ərazilərinin yaradılması və idarə olunması haqqında” yeni qanun layihəsi hazırlayıb.
TELEJURNAL. az AZƏRTAC-a istinadla xəbər verir ki, bu qanun ölkədə biomüxtəlifliyin qorunması və inkişaf etdirilməsi ilə bağlı hökumət proqramı əsasında hazırlanıb.
Hökumətin qərarına əsasən, Raça-Leçxum-Kvemo Svaneti bölgəsində 50 894 hektar ərazidə Raça Milli Parkı yaradılacaq. Mühafizə olunan təbiət ərazilərinin yaradılması nəticəsində rayonda inzibati mərkəz fəaliyyət göstərəcək və yeni iş yerləri açılacaq.
Eyni zamanda, regionda biomüxtəlifliyin, landşaftların və ekosistemlərin mühafizəsi, təbii sərvətlərin davamlı idarə olunması təmin olunacaq.
Qeyd edək ki, UNESCO-nun qərarı ilə Gürcüstanın Kaxeti bölgəsində yerləşən iki – Dedoplistskaro və Üç Alazani qorunan ərazilərinə biosfer qoruq statusu təqdim edilib.
Biosfer qoruqlar bioloji müxtəlifliyin qorunması və təbiətdən davamlı istifadə maraqları naminə insan və təbiətin harmonik qarşılıqlı əlaqəsini təşviq etmək üçün nəzərdə tutulub.
Məlumat üçün bildirilir ki, Gürcüstan ətraf mühit, mədəni və ya buna bənzər dəyərlərinə görə bir neçə qorunan əraziyə malikdir.
Gürcüstanın qorunan ərazilərinin ümumi sahəsi 511 123 hektardır, bu ölkə ərazisinin təqribən 8,33 faizini təşkil edir. Mühafizə olunan ərazilərin ümumi sayı isə 90-dır.
Hazırda Gürcüstanda 14 sərt təbiət qoruğu, 11 milli park, 18 idarə olunan təbiət qoruğu, 40 təbii abidə və 2 qorunan landşaft var.
Sərt təbiət qoruqları 140,672 hektar, milli parklar isə 276,724 hektar ərazini əhatə edir.