Gürcüstan Baş naziri ilə Türkmənistan prezidenti arasında keçirilən görüşdə iki ölkənin tranzit potensialı əsas müzakirə mövzusu olub.
Gürcüstanın Baş naziri İrakli Qaribaşvili Mərkəzi Asiya regionuna səfəri çərçivəsində Türkmənistan Prezidenti Serdar Berdiməhəmmədovla görüşüb. Görüşdə Gürcüstan-Türkmənistan əlaqələrinin dərinləşməsi, birgə layihələr, Gürcüstan və Türkmənistanın tranzit potensialı əsas müzakirə mövzusu olub.
TELEJURNAL. az AZƏRTAC-a istinadla xəbər verir ki, bu barədə Gürcüstan hökumət administrasiyasından məlumat verilib.
Bildirilir ki, söhbət zamanı regional nəqliyyat layihələri və onların gələcək inkişafı diqqət mərkəzində olub. Bildirilib ki, bu strateji layihələrin həyata keçirilməsi Asiya ilə Avropa arasında Xəzər və Qara dəniz vasitəsilə yükdaşımaların səmərəliliyini və təhlükəsizliyini artıracaq. Eyni zamanda, ticarət-iqtisadi əlaqələrin genişlənməsinə və regionlararası əlaqələrin inkişafına təkan verəcək.
Gürcüstan yeni avtomobil və dəmir yollarının tikintisinə, dəniz limanlarının imkanlarının genişləndirilməsinə böyük sərmayə qoyur və Gürcüstan ərazisindən Qara dənizə gedən dəhlizdən istifadə Türkmənistan üçün sərfəlidir.
Tərəflər enerji sahəsində strateji tərəfdaşlığa da toxunub, mövcud əməkdaşlığı daha da dərinləşdirməyə hazırlıq ifadə olunub.