Ağdaş rayonunda gənc könüllülər müharibə şəraitində olan ölkəmizdə koronavirus pandemiyası təhlükəsinə qarşı genişmiqyaslı mübarizə tədbirlərinə dəstək verilməsi və sosial həmrəylik nümayiş etdirilməsi məqsədilə vətəndaşlar arasında maarifləndirici aksiyalar keçirirlər.

Rayon Gənclər və İdman İdarəsindən AZƏRTAC-ın bölgə müxbirinə bildirilib ki, dünyanı bürüyən koronavirus pandemiyası son günlərdə Azərbaycanda da geniş yayılmaqdadır. Bu baxımdan tətbiq olunan karantin rejimi qaydalarına vətəndaşlar tərəfindən əməl olunması xüsusilə vacibdir. Təəssüf ki, bu qaydaları gözləməyən, ona biganə yanaşanlar da var. Xüsusilə ictimai yerlərdə bəziləri tibbi maskalardan istifadə etmir, ara məsafəni gözləmir, zəruri olmadığı halda evdən çıxaraq küçə və paklarda sıxlıq yaradılar. Gənc könüllülər, qrafik üzrə mütəmadi olaraq ictimai yerlərə – mağazalara, yeməkxanalara, bank və bankomatların qarşısına, ümumiyyətlə sakinlərin çox olduğu yerlərə gedir, artıq ölkəmizdə ikinci cəbhə olan koronavirus pandemiyası təhlükəsinin yarada biləcəyi problemlər barədə izahat işləri aparırlar. Könüllülər ünsiyyətdə olduqları hər kəsə karantin qaydalarına ciddi əməl etmələrinin zəruriliyini xatırladırlar.