Gələcəkdə Zəngilanda, Füzulidə, Laçında və Qubadlıda avtovağzalların fəaliyyəti planlaşdırılır-Elməddin Muradlı
Horadizdən Ağalıya müntəzəm təşkil olunan marşurutlar və bunun nəqliyyat sahəsi üzrə önəmi haqqında Nəqliyyat Eksperti Elməddin Muradlı Teıejurnal.az-a açıqlamasında bildirib:
“Horadizdən Ağalıya və Ağalıdan Horadizə marşurut xəttləri hal hazırda da fəaliyyət göstərir, amma bu qeyri – rəsmi formada fəaliyyətdir. Hazırda Azərbaycan Yerüstü Nəqliyyat Agentliyi həmin marşurutlar üzrə rəsmi fəaliyyəti tənzimləmək üçün müsabiqə elan edib.Azərbaycan Yerüstü Nəqliyyat Agentliyinin saytında da müsabiqə barədə məlumatlar verilib. Düşünürəm ki, daşıyıcı şirkətlər, hüquqi və fiziki şəxslər bu müsabiqələrə qatılmaqla bu xidməti həm keyfiyyətli, həm də qanuni şəkildə həyata keçirə bilərlər.Təhlükəsizlik məsələləri önəmlidi, müntəzəmlilik mütləq qorunmalıdır. Yəni, burda nəzarət çox vacibdir. Azad olunmuş ərazilərə müntəzəm şəkildə marşurutların işə salınması yaxşı olar. Çünki artıq Laçında da məskunlaşma baş verdi.Yəni, Ağalıdan sonra Qubadlı , Qubadlıdan sonra Laçının kəndləri. Düşünürəm ki, həmin istiqamətlərdə də xidmətlərə böyük ehtiyac var. Vətəndaşların məmnunluğunu təmin etmək üçün bu xidmət göstərilməlidir.Düşünürəm ki, yaxın zamanda bunlar barədə də tədbirlər görüləcək. Ümumiyyətlə, sərnişin daşıma bütün istiqamətlərdə keyfiyyətli bir formaya gəlib çıxmalıdır. Nəinki, digər ərazilərdə, elə işğaldan azad olunmuş ərazilərdə də, bu məsələlərə çox ciddi yanaşma gözlənilir. Hələlik, qeyri-formal da olsa, bu marşurut xəttləri işləyir, amma bunu formal çərçivəyə salmaqla vətəndaşlara daha komfortlu və təhlükəsiz xidmət göstərmək vacibdir. Getdikcə, bilet sistemini də tətbiq etmək olar. Bu zaman sürücülər sui-istifadə edərək vətəndaşlardan artıq pul ala bilməzlər. Məndə olan məlumata görə, yaxın gələcəkdə Zəngilanda, Füzulidə , Laçında və Qubadlıda avtovağzalların fəaliyyəti planlaşdırılır.Bunlar nəzərdə tutulan işlərdir”.
Nigar Əkbərova.
