Fransa portalı: Avropa rəsmi Bakıdan kömək istəyir
Fransanın “Causeur” portalında “Ukraynada müharibə: Avropa Bakıdan kömək istəyir” sərlövhəli məqalə dərc olunub.
” TELEJURNAL” AZƏRTAC-a istinadən xəbər verir ki, məqalədə Avropada bugünkü vəziyyətə toxunulur, Avropanın üzləşdiyi çətinliklərdən söz açılır. Belə bir vəziyyətdə Avropanın rəsmi Bakının yardımına ehtiyac duyduğu qeyd edilir.
Ölkəmizin 30 il ərzində üzləşdiyi işğaldan da danışılan yazıda Azərbaycan rəhbərliyinin müdrik siyasəti sayəsində ölkənin çətin iqtisadi vəziyyətdən çıxmasından, tarazlaşdırılmış xarici siyasətindən bəhs olunur. Ölkəmizin müəllifi olduğu və bu gün Avropanın enerji təhlükəsizliyinin təminatında misilsiz rolu olan, böyük əhəmiyyət daşıyan beynəlxalq layihələrə, o cümlədən neft və qaz kəmərlərinə xüsusi diqqət çəkilir.
Vurğulanır ki, müstəqil iqtisadi inkişafa nail olan Azərbaycanın bu gün beynəlxalq arenada xüsusi yeri var. “Bəzi məlumatlara görə, Azərbaycan Prezidenti İlham Əliyevin telefonu susmur. Avropa İttifaqı Şurasının Prezidenti Şarl Mişel, İtaliya Respublikası Nazirlər Şurasının Sədri Mario Draqi, NATO-nun Baş katibi Yens Stoltenberq, Fransa Prezidenti Emmanuel Makron son günlər Prezident İlham Əliyevə tez-tez zəng edirlər”, – deyə müəllif qeyd edir.
Məqalədə Azərbaycanın 2021-ci ildə Türkiyə, İtaliya, Yunanıstan və Bolqarıstan kimi ölkələrə 19,5 milyard kubmetr təbii qaz göndərməsindən və qarşıdan gələn aylarda bu rəqəmi daha da artıracağından bəhs olunur.
