Finlandiya səfiri: “Jurnalistlər üçün keçirilən ikigünlük seminarda üç aspektə diqqət yetirilir”

“Media mütəxəssislərinin təhlükələrə hazır olmasına və onların qarşısını almağa kömək etməli olan Bakıda jurnalistlər üçün “Media və hibrid hücumlar” adlı ikigünlük seminar üç aspektdən ibarətdir”.

Telejurnal  xəbər verir ki, bunu jurnalistlərə açıqlamasında Finlandiyanın Azərbaycandakı səfiri Kirsti Narinen bildirib.

Onun sözlərinə görə, birinci aspekt xaricdən gələn informasiyaya qarşı mübarizədir: “Hər bir ölkə bu və ya digər şəkildə belə təsir obyektidir”.

Səfir qeyd edib ki, ikinci aspekt media savadlılığına, yəni auditoriyanın real hadisələrə əsaslanan materialları xəbər axınından ayırd edə bilməsinə həsr olunub: “Bu, media istehlakçılarından bacarıq tələb edir. Bizdə bu, mediada tənqidi düşüncə, eləcə də gənc nəslin təhsili ilə bağlı geniş ictimai müzakirələr deməkdir”.

K.Narinen vurğulayıb ki, üçüncü aspekt həqiqəti əks etdirən informasiyanın çatdırılmasında medianın roludur: “Peşəkar media sosial şəbəkələrdən fərqlənir. Peşəkar jurnalist mediası faktlara və rəqəmlərə, o cümlədən media istehlakçılarının tənqidi təfəkkürünü dəstəkləyən təhlillərə əsaslanaraq həqiqəti çatdırmaq üçün yaradılıb”.