Ermənistanda sökülən xaçlar – inanclarında da səmimi olmayan ermənilər
Ermənistan uzun illərdir Azərbaycanın tarixi, mədəni və dini abidələrini dağıdıb. Onlar bu vəhşiliyi həm ölkə daxilində, həm də Qarabağ və ətraf rayonları işğal altında saxladıqları zaman ediblər.
Rəsmi məlumata görə, Azərbaycanın bu bölgəsində təsbit olunan tarixi-dini abidələrin sayı 403-dür. Onlardan 67-si məscid, 144-ü məbəd, 192-si ziyarətgahdır. Qarabağ və ətraf rayonların ərazilərində rəsmi fəaliyyət göstərmiş 67 müsəlman məscidinin (Şuşada 13, Ağdamda 5, Füzulidə 16, Zəngilanda 12, Cəbrayılda 5, Qubadlıda 8, Laçında 8) 63-ü tamamilə, 4-ü isə qismən dağıdılaraq yararsız hala salınıb.
Bu vəhşiliklər qarşısında utanmayan Ermənistan hakimiyyəti Azərbaycanın Qarabağ iqtisadi rayonunda guya “ermənilərin dini abidələri”, “xristian abidələri”nin “dağıdılması” ilə bağlı saxtakarcasına hay-küy salır. Halbuki dağıdıcılıq onların xislətində var.
Ötən gün Ermənistanda çıxan “Hraparak” qəzeti xristianlığın atributlarının küçələrdən yığışdırılması ilə bağlı hökumətin qərarını yayıb. Ərazi idarəetmə və infrastruktur naziri Qnel Sanosyandan bələdiyyələrə belə bir məktub daxil olub: “Ermənistan Respublikasının beynəlxalq və respublika əhəmiyyətli avtomobil yollarında könüllü olaraq ucaldılmış (quraşdırılmış) xatirə daşlarının, xaçların və xaçkarların sökülməsi üçün hər kəsdən regional müfəttişlik bölmələri ilə əməkdaşlıq etməyi xahiş edirəm”.
Qəzet bunu “hökumətin növbəti əxlaqsız qərarı” kimi təqdim edib. Hökumət başçısı Nikol Paşinyan məsələyə münasibət bildirməyib. Bununla belə, “xristian simvolları” sayılan rəmzlərin yollardan təmizlənməsini də türklər və azərbaycanlılarla əlaqələndirirlər. İddia edirlər ki, guya bununla Ermənistan barışıq üçün addım atır.
Bu iddia çox gülünc səslənir. Türkiyə və Azərbaycanda çoxlu sayda xristian dininə inananlar, habelə kilsələr var. Hər iki ölkənin xristian vətəndaşları dini ayinlərini sərbəst şəkildə icra edirlər. Bundan başqa, Türkiyə və Azərbaycan ərazisində çoxlu sayda tarixi xristian abidələri də mövcuddur. Odur ki, Ermənistanda xaç nişanlarının sökülməsini də Türkiyə və Azərbaycana bağlamaq erməni vəhşiliyini ört-basdır etmək cəhdidir.
Çünki yüz ildən artıqdır ermənilər Azərbaycanın tarixi mədəni-dini abidələrin dağıdılmasında barbarlıq edir. Bu xasiyyətini isə dəyişə bilmir. Onlar üçün məscid, kilsə və ya xaçı dağıtmağın fərqi yoxdur. Çünki onların milli tərbiyəsi kin, nifrət və hikkə üzərində qurulub. Onlar inanclarında da səmimi deyillər. Belə cəmiyyət Allaha sevgisində də saxta olar…
