Ermənistan əhalisi azalır: 3 milyon nəfərdən də aşağı düşüb
2022-ci ilin oktyabrına Ermənistanın daimi əhalisi 2 milyon 928 min 914 nəfər təşkil edib. Bu rəqəmə adətən burada yaşayan, lakin bir ilə qədər ölkədə olmayan şəxslər də daxildir.
TELEJURNAL xəbər verir ki, Ermənistan Statistika Komitəsi ötənilki siyahıyaalınmanın ilkin məlumatlarını dərc edib. Daimi əhali ilə yanaşı, cari əhalinin indeksi də təqdim olunub. Siyahıyaalma zamanı Ermənistanda əhalinin sayı 2 milyon 638 min 917 nəfər olub.
Sonuncu siyahıyaalma 2011-ci ildə aparılıb. Onda daimi əhalinin sayı 3 milyon nəfəri keçirdi. Bu illər ərzində daimi əhali təxminən 90 min, sorğular zamanı Ermənistanda olan əhali isə təxminən 233 min nəfər azalıb.
Ötən ilin oktyabrında keçirilmiş əhalinin siyahıyaalınması müstəqil Ermənistanın tarixində üçüncüdür. Mütəxəssislər hələ siyahıyaalmanın dərin təhlili ilə məşğul olmayıb. Onlar yekun məlumatları gözləyirlər. Amma indiki mənzərə artıq faciəvi adlandırılır.
Tarix elmləri namizədi, etnocoğrafiyaşünas Artaşes Boyacyan bundan əvvəlki iki siyahıyaalmanın bilavasitə iştirakçılarından biridir. O, siyahıyaalma inspektoru olub. Boyacyanın sözlərinə görə, əgər 2018-ci ilə qədər Ermənistanın əhalisi mühacirət səbəbindən azalırdısa, sonradan doğum səviyyəsi problemə çevrilməyə başlayıb.
“2018-ci ildən sonra Ermənistan Respublikasının bir sıra regionlarında, xüsusən Lori bölgəsində əhalinin təbii artımının mənfi olduğu, yəni doğulanların sayının ölənlərin sayından aşağı olduğu ilk göstərici qeydə alınıb. Eyni göstərici 2020-ci ildə Şirakda və respublikanın bir sıra bölgələrində qeydə alınıb”, – Boyacyan “Azatutyun” radiosuna bildirib.
İstər keçmiş, istərsə də indiki hakimiyyət Ermənistan əhalisi ilə bağlı qarşısına məqsəd qoyub. Dörd il əvvəl baş nazir Nikol Paşinyan 2050-ci ilə qədər strategiyanı təqdim edərkən əhalinin sayını ən azı 5 milyon nəfərə çatdırmaq məqsədindən danışmışdı. Artaşes Boyacyan qeyd edib ki, belə yüksək məqsədə baxmayaraq, dövlət buna yönəlmiş ciddi demoqrafik siyasət aparmır.
“Təqdim olunan dövrdə əhalinin artımını stimullaşdırmaq üçün müəyyən addımlar atılır. Amma bu, keyfiyyət və kəmiyyət baxımından effekt vermir”, – deyə tarixçi bildirib.